I te 14 nö Eperëra 1972 i haamana ai te Apooraa Rahi i te parau tä W. Wallace Smith i tuu atu ia rätou mai te parau ë : “ò teie ïa te parau ä te Atua i te Etaretia i teie nei nö nä faatöroàraa i faahitihia, e ia neneìhia ïa i roto i te Puta Fafau.”
O teie hoì te tahi mau faaueraa i faahitihia i roto i taua heheuraa ra, òia hoì : Mai te matahiti 1960 mai-ä i tupu noa ai te mau räveà âpï nö te pororaa i te Evaneria i te mau nünaa e te mau fenua âpï, e ua arataìhia ïa ia haapaò-ä i taua mau räveà ra. Ua faauehia ïa ia haapii-ä i te òhipa tumu e au nä te Hiero e haapaò, e ia faaitoito-ä i te haaputuputuraa faufaa nö te mau òhipa atoà ä te Etaretia. E au i te ture nö te tïààuraa ia faahereherehia te mau faufaa tumu ä te ao täâtoà nei. Ia haamanaò tö te Etaretia ë, te vai nei-ä te arataìraa ä te Värua i nià i te feiä faatere ö te Etaretia. Ua faauehia te Feiä Moà ia amo i te mau hopoià nö rätou ò te òre-ä i faaroo i te Haapaòraa Teretetiäno a pärahi ai rätou i te mau nünaa taa-ê ; ia ìmi hua rä te feiä moà i te mau räveà ia tae roa taua faaroo ra i ô roa ia rätou ra. Ua tüâti atu te Perofeta i teie ômuaraa i tä na parau-uru-raa i te nä-ô-raa atu ë :
“I muri aè i tö ù ìmi-ûàna-raa i te märamarama nö te haamaitaì e nö te mau hinaaro tià nö te Etaretia, te püpü atu nei au i tei muri nei mau parau èi hinaaro nö te Fatu nö tä na Etaretia, mai tei faaauhia mai nä òutou na e tei tuuhia mai nä roto i te värua heheuraa e te feruriraa paari. Ei haapäpüraa, e èi haamäramaramaraa, te faaìte atu nei au ia òutou ë, ua faaarahia vau i te poìpoì roa i te 16 nö Fepuare 1972, e ua päpaì au mai tä te Värua i faaue mai ia ù. E teie nei, nö tö ù nei tiàraa, ua faatiàhia vau ia hopoi atu i teie nei heheuraa ia òutou na, èi arataìraa i te Etaretia i teie mau mahana hopeà nei. Te anihia atu nei mä te manaò haèhaa e te au-maitaì-raa, ia feruri ûàna mä te paari, e ia färii òutou i te reira mä te pure. »
1
A. Nö tö ù nei tävini, ò Donald O. Chesworth : Ua färii maitaì au i tä òe täviniraa i roto i tö òe töroà Àpötetoro. Ua hope te tau nö tä òe täviniraa èi mero i roto i te Tino Ahuru-mä-piti.
B. Te parauhia atu nei òe ia tämau-ä i te täviniraa i te Feiä Moà i roto i te tiàraa èi Haapii Evaneria e èi Patereäreha, e tä òe na tuhaa rahi ò te aòraa èvaneria ïa. Mai te mea rä, e tià ia òe, e faatöroàhia ïa òe i te taime e fätata mai nei, e ia rave òe i tä òe täviniraa i ô i tö mau taeàe nö te Hiva Haapii Evaneria.
2
A. Nö te faaî i te pärahiraa vata, ua parauhia tö ù nei tävini ò John C. Stuart èi Àpötetoro, e ia faataahia ò ia èi mero nö te Tino Ahuru-mä-piti, ia faarirohia atu tö na tiàraa Tahuà Rahi èi Àpötetoro
B. Mai te höê ìte-tià-mau, e tävini ò ia i rotopü i tö na mau taeaè nö te reira âpooraa, e ia faatöroàhia ò ia i te taime fätata mai, ia òre ia faaea te òhipa pororaa èvaneria i teie nei fenua, e i te mau fenua èê e tià ai ia ìtea tö ù nei iòa.
3
A. I te mau tau ahoaho e te teimaha ö te òhipa ö tö ù tävini ò Walter N. Johnson mai te faahope i tö na püai i tö na tiàraa Epitöpo. I nä matahiti e ono i haapaò ai ò ia i te töroà Epitöpo Faatere nö te haapäpüraa i te òhipa ä te Etaretia e i te faanuuraa i te Pätireia i mua.
B. Ia vaiiho-faatura-hia ò ia i tä na òhipa teiaha roa i teie nei, ia tämau-ä rä ò ia i tä na vähi i roto i te Pupu Tahuà Rahi èi Epitöpo. E tävini ò ia i taua tiàraa ra i te tahi atu-ä mau vähi ö te ao nei, mai te au i te mau tau e te mau räveà e au ai, èita rä ò ia e tonohia e te Feiä Faatere.
4
A. Nö te faaî i te vähi e èrehia nei, e ia au i tö ù hinaaro, te parauhia atu nei nä roto i te heheuraa ä tö ù nei tävini Perofeta, ua piihia ò Francis E. Hansen ë, e mea tià ia faataahia ò ia èi Epitöpo Faatere i tä ù Etaretia i teie mau mahana hopeà nei.
B. I te reira tiàraa e tuuhia te höpoià rahi i nià ia na ia rave ò ia i te òhipa èi Peretiteni nö te Autahuàraa ä Aarona nö te haapiiraa e nö te faaineineraa ia rätou nö te òhipa, mai tei au i te mau faataaraa e te ture ä te Etaretia.
5
A. E teie faahou-ä, mai tei au i tö ù hinaaro e nö te tämau-ä i te reira pupu, te parauhia nei ò Harold W. Cackler ia vai noa-ä ò ia èi Faaaò nö te Epitöpo Faatere.
B. E nö te faaî i te Faatereraa Epitöpo, te parauhia nei tö ù tävini ò Gene M. Hummel èi Faaaò nö te Epitöpo Faatere ë, e mea tià ia faatöroàhia ò ia i teie töroà. Te faauru-faahou-hia nei au e te Värua ia tuu atu-ä i teie nei mau parau èi aòraa e èi arataìraa.
6
Te haamäuruuruhia atu nei òutou èi Autahi e òutou tätaìtahi e tö ù mau taata, nö tä òutou na haapaò maitaì i te mau tïtauraa nö tä ù nei Etaretia nö te haaparareraa atu i te Evaneria e nö te haafäriuraa mai i te mau mero âpï i roto i te Tino nö te Metia, e òia atoà hoì, nö tä òutou na haapaòraa i te ture nö te tïààu e te àufauraa i tä òutou mau àhururaa. Nä roto i tö òutou nä-reira-raa i faataa mai ai òutou i te faufaa e hinaarohia nö te tautururaa ia rätou e rave rahi ò tei ère i te pae värua e i te pae tino atoà hoì.
7
E ànotau ahoaho roa teie. E rave rahi taata tei püpü-tütia-faufaa-òre-hia i te mau atua nö te tamaì, nö te nounou e nö te àimoni. Te hämani-ìno-hia nei te fenua nä roto i te haamäuà tià-òre-noaraa i te mau faufaa tumu nö te oraraa. Ia haapaò outou i tä ù nei faaueraa, e tià ai, e ia nä mua òutou ia rätou atoà e ìmi ûàna ra ia faaòrehia taua haamäuàraa ra, òi vaivai aè te ao.
8
A tämau-ä i te mäìmi i te tätararaa paari nö te òhipa tumu e te mäìtiraa i te vähi tiàraa hiero nö tö ù nei iòa, èi vähi haapiiraa i tä ù nei Autahuàraa. Mai te mea e itoito òutou i te reira, e mä te püpü tämau-ä i te faufaa moni nö te reira, a taa noa atu ai ë, te manaòhia rä ë, e faaèrehia òutou iho nö te höê tau, e haamaitaìhia rä òutou i tei navaì ia òutou ë, e rahi noa atuä hoì.
9
Te faaarahia atu nei òutou ia turu i tö òutou na huimana ò tä ù i mäìti ia faataahia, ia tià atoà ia ù ia faatura ia rätou nä roto i tö ù Värua. Ei reira te mau faaueraa i tuuhia atu nä òutou nö te faaòhiparaa i te meroraa, e nö te faaineineraa i te Autahuàraa, e haerevave ai i mua, ia au i tei faaìtehia atu i roto i te mau faaueraa nä mua atu na.
10
A. Ua niuhia te faaipoiporaa teretetiäno i nià iho i te tiàturiraa tumu nö te faaipoiporaa i te vahine e te tane höê. Terä rä, mai tä ù i parau-ê atu na, te vai nei-ä rätou ò tei òre-ä i ö atu i roto i teie nei nana ë, ia tae atu ïa ia rätou ra te mana faaora ö te èvaneria, e tià ai.
B. Ia nä-reira-hia rä, e tïtauhia ïa ia amo te Etaretia mä te faaòromaì i tä rätou ra mau hara, e mä te aupurupuru mäite ia rätou i te faaroo nei, e mä te färii i tä rätou ra tätarahaparaa e maraa ia rätou, a hiò atu ai i te tau mä te faaòromaì e te aroha, e tià ïa ia rätou ia riro èi feiä tiàmä i te mau hara i ravehia i te mau matahiti a pärahi ai rätou i roto i te ìte-òre.
11
A. Nö te reira hopeà e te reira tumu, a tämau-ä ïa òutou i te täviniraa i taua mau nünaa ra ò tei òre-ä i ìte i te òaòa ä te tätarahapa e riro i te âfaì mai i roto i tö rätou oraraa. Maoti te reira räveà e arataìhia ai rätou ia ìte i te mau haapiiraa nö tä ù èvaneria ë, e faaineinehia rätou ë, e ànaànatae ai rätou nö te tauturu i te haaparareraa i te parau ora nö te faahauraa e te haafäriuraa i te tahi atu-ä mau taata e tià ia faaturahia.
B. I roto i teie òhipa täviniraa te faauehia nei te Tino Ahuru-mä-piti, rätou te mau ìte päpü nö te èvaneria, ia tätara, e ia faatere i te mau haapiiraa faaroo e te mau faaueraa nö te èvaneria nä roto i te mau räveà e au i te huru ö te oraraa ò taua mau nünaa ra.
12
A. Ia vai noa te värua tähöê i rotopü ia òutou na, ia üpootià tä ù Etaretia i teie tau fifi rahi roa ìno e tià ai ë, èi mana mau i nià i tö te ao nei nö te faaotiraa i te òhipa i faataahia nä na ra. Outou e tö ù nei nünaa ë, ua mäìti-mau-hia òutou nö te tauturu i te faatupuraa i teie òhipa faufaa rahi i teie mau mahana hopeà nei.
B. A faaruè atu na i te mau âmahamaharaa e rave rau, e ia riro òutou èi höê mai tei òre-ä i ìtehia i rotopü ia òutou na, a rave âmui ai te täâtoàraa i te òhipa ia au i te mau horoàraa tä ù i ninii atu i nià ia òutou na ë, èi ia òutou atoà na tö ù nei Värua mai teie nei e a muri noa atu. Amene.
Tö òutou tävini i te Metia,
W. Wallace Smith,
Peretiteni nö te Etaretia
I Initipeniteni, Mituri,
I te 11 nö Eperëra 1972