Ua höroàhia mai teie heheuraa nö te mau tauiraa tei tïtauhia i roto i te Hui Mana ö te Etaretia. Ua vaiiho-ê-hia na nä Àpötetoro ra ò Reed Holmes, ò Cecil Ettinger e ò Earl Higdon i tö rätou tiàraa i roto i te Apooraa Tino Ahuru-mä-piti. Ua monohia ò Roy A. Cheville e Reed M. Holmes i te töroà Patereäreha.
Nö te Tino Ahuru-mä-piti i parauhia ai ò William R. Higdon mai te Peretiteniraa nö Graceland College e ò Lloyd B. Hurshman räua ò Paul W. Booth mai roto atu i te mau âua òhiparaa i te mau paeàu, e mai roto atu i tö räua tiàraa Faatere Nui nö nä tuhaa faatereraa ä te Etaretia Rahi.
Ua faaarahia tö te Etaretia ia ìmi mäite nä roto i te manaò faafaite i te räveà ia faaòrehia te mätuturaa nö te huru faatereraa i te mau òhipa Etaretia e te mau puta haapiiraa e te vai atu ra.
I muri mai i te päheruraa i te parau faaìte ä te mau Apooraa Faatere e te mau Apooraa e te mau Pupu, i haamanahia ai te heheuraa e te Apooraa Rahi i te 3 nö Eperëra 1974.
I te mau Apooraa Faatere e te mau Apooraa e te mau Hiva ä te Etaretia e i te Apooraa Rahi :
I muri aè i tö ù feruri-ûàna-raa e te pure-onoono-raa i faatiàhia ai au ia tuu atu, mä te turuhia e te Värua ö te heheuraa e te manaò paari, i teie parau i muri iho nei nö te höê mau tauiuiraa i roto i te Hui Mana ö te Etaretia Rahi, e teie atoà nei parau èi aòraa e èi haapiiraa i te meroraa täâtoà
1
A. O Roy A. Cheville ò tei tävini èi Patereäreha Faatere nö nä matahiti höê àhuru mä ono, e tià roa ïa ia haamämähia ò ia i taua höpoià ra. E ia vaiiho-faaturaroa-hia ò ia, e ia parauhia ò ia ë, Te Patereäreha Faatere Hanahana ö te Etaretia.
B. I tä na tau faafaearaa i te òhipa täviniraa e tià ia na ia haapaò-rii-ä ò ia i tä na tautururaa i te òhipa, èiaha rä ia amo faahou-ä i te mau höpoià e te mau teiaharaa nö te faatereraa i te Pupu, e te tiàraa mitinare i te mau âua òhiparaa.
2
Te parau nö Reed M. Holmes : ua tävini maoro èi àpötetoro e èi ìte-tià-mau, te parauhia nei, mai te mea ia tià ia na, ia riro ò ia te Patereäreha Faatere mä te haapaò i te mau tuhaa òhipa e te mau höpoià atoà nö taua töroà ra, ia oti òiòi aè i tö na faatöroàraahia.
3
A. Nö Cecil R. Ettinger : ua faaineine ia na iho nä roto i te mau haapiiraa taa-ê, e te mäìmiraa i te arataìraa ö te Värua i hau roa atu ai tä na täviniraa èi àpötetoro, e i rahi roa atu ai tä na tuhaa nö te faanuu i te Etaretia i mua.
B. E faatoro atu-ä tö na tiàraa àpötetoro èi ìte-tià-mau, èi Tahuà Rahi i roto i te Autahuàraa ä Merehiteteta. E nä te Peretiteniraa ö te Autahuàraa rahi e faataa nä na i tä na mau tuhaa òhipa, e mä te taui i te reira tuhaa òhipa i terä e terä taime ia hinaarohia.
4
A. Nö Earl T. Higdon : ua pähono ò ia i tö na parauraahia èi àpötetoro mai te maitaì a tävini ai ò ia iö tö na mau taeaè i roto i te Tino Ahuru-mä-piti, mä te taa päpü ia na ë, èita e maoro tä na täviniraa i roto i te reira töroà.
B. Ua tae mau te tau ia tuu-ê ò ia i te mau höpoià teimaha tä te tïtauraa nö te hähaere-noa-raa e nö te òhipa faaterenoa-raa e vai noa nei i nià ia na. Te vai atoà ra te taime e vaiiho-faatura-hia ai ò ia, mä te òre e tuu i nià ia na te tahi atu-ä faataaraa òhipa.
Nö te faaî i te mau pärahiraa vata, te parau atu nei au ë teie tä ù i manaò e ò te arataìraa ïa ö te Värua Maitaì : ia färii te mau taeaè i raro nei i tö rätou mau tiàraa i roto i te Tino Ahuru-mä-piti èi mau àpötetoro e èi mau ìte-tià-mau nö tö rätou Fatu ra ò Ietu Metia. I raro aè i tä na faatereraa e tä na arataìraa e noaa mai-ä ia tätou päâtoà te parauraa e te mana nö te òhipa.
5
A. Ua tae roa atu te Peretipütero ra ò William T. Higdon i te tiàraa fäito-òre èi ìte-taa-ê i te mau taata atoà ra i te ao atoà nei, noa atu tö rätou huru e àore rä tö rätou täura, e te huru ö te tiàturiraa ö taua mau taata ra. Nö te reira e nö te tahi atuä mau tumu tià, i parauhia atu ai ò ia èi àpötetoro ë, e tià roa ia faatöroàhia e ia haapaòhia ò ia nö taua töroà ra.
B. I tae-ê mai na teie parauraa, terä rä, nö te tahi tumu rahi roa atu i täpeàhia ai te parauraa ia tävini-ä ò ia i te feiä âpï ä te Etaretia èi Peretiteni Faatere nö te Fare Haapiiraa Tuatoru nö Graceland College. Teie rä, ua tae mau te tau ia faaoti-vavehia te reira e ia faanahonahohia te mau räveà nö te haamahiti ia na i tä na mau òhipa faatere i te Fare Haapiiraa.
6
Te parauhia nei te Peretipütero ra ò Lloyd B. Hurshman èi àpötetoro. E faaâàno atu-ä, e faarahi atu-ä ò ia i tä na tautururaa a rave ai ò ia i tä na tuhaa täviniraa e vai nei. Terä rä, e noaa atu ia na te mana rahi aè i tö na faatöroàraahia e tö na faataaraahia èi àpötetoro i teie mau mahana hopeà nei.
7
Ua ìte-päpü-hia tö te Peretipütero ra ò Paul W. Booth àravihiraa nö te tävini i te Etaretia nä roto i te höê mau òhipa. Te parauhia nei ò ia i te töroà àpötetoro. E faatöroà ë, e faataahia ò ia nö taua töroà ra. Ei reira ra, e tià ai ia na ia haapaò i tä na tuhaa täviniraa a tähöê atu ai ò ia i tö na mau puè taeaè èi mero nö te Tino Ahuru-mä-piti.
Ua tae atoà mai ia ù te tahi mau ìte höhonu taa-ê a feruri onoono ai au i te òhipa täviniraa nö te tau a muri atu nö te Etaretia e au i te parau ä te Atua ra nö te òhipa « i tuuhia i nià ia tätou päâtoà ». E tià roa ia ù ia faaìte-päpü atu i taua mau ìte höhonu ra i raro aè i te arataìraa ö tö ù Metua i te Ao ra.
8
A. Eiaha òutou ia faatià i te teòteò nö tö òutou iho manuiaraa i te òhipa e faaätea-ê atu ai òutou ia òutou iho, te mau taeaè ë te mau tuahine i roto i te Metia, i te òhipa tä ù i hinaaro. Ua faataahia òutou ia tävini i tö na ra iòa, i te hinaaro anaè rä ö tö òutou na Metua i te Ao ra.
B. A faafaite ia òutou òutou iho. Eiaha roa e faatià te märöraa a feruri ai òutou i te huru ö te faatereraa òhipa e nö te mau täpaò arataìraa e faataa-ê atu ai ia òutou, òi mörohi ai tä ù òhipa hämani maitaì i te ao nei i te mana püai ö te värua-ìno.
9
E òutou na ò tä ù mau pipi ë, ia vai noa-ä òutou èi feiä mata-ara i mua i te mau pupu taata ò tei tiàturi roa i te parau ë, e faufaa rahi tö te mau taata atoà, e ò tei tämata mä te fäito-òre ia faaìte atu i te parau ä Tö ù Tamaiti nö te haamaitaì i tö rätou ra mau oraraa taata, e tià ai.
10
A haa âmui ai òutou nö te faariro i taua hopeà ra, nö te faatupu ïa i te tähöêraa, e te haamataraa ö te mau fifi, e te haamäharaa i te mau au-òre ö te mau taata tätaìtahi, e te faaoraraa i te mau pëpë ò te haaparuparu i te püai ö te Etaretia i te pae värua e te pae tino atoà hoì. E ia haapaò òutou i te reira nä roto i te värua here e te aroha höhonu e tià ai e mai te au i tei ìte-maitaì-hia i roto i Tö ù Tamaiti a pärahi ai ò ia i rotopü ia òutou na.
Nä roto i te âau haèhaa, mä te mana tiàraa rä ö tö ù töroà, e mä te haapäpüraa ö te mana ö te Atua tei arataì noa na i tä ù faaìteraa, te tuu atu nei au i teie parau i te Etaretia nä roto i te mau Apooraa Faatere, te mau Apooraa, te mau Hiva e te mau raumaire ia feruri e ia faaotihia
Tö òutou tävini i te Metia
W. Wallace Smith
Peretiteni nö te Etaretia
I Initipeniteni, Mituri
I te mahana mätämua nö Eperëra 1974