Ua tuu atu te Peretiteni ò Wallace B. Smith i teie heheuraa i te mau Apooraa e te mau Apooraa Faatere e te mau Hiva e tö te Apooraa Rahi i te 8 nö Eperëra, èi parau i faauruhia mai nö te hinaaro ö te Atua, e ua haamanahia e rätou ia neneìhia ïa i roto i te Puta Haapiiraa faaroo.
Ua faaineine te Peretiteni Smith i te tahi ômuaraa parau èi haamäramaramaraa nö tä na heheuraa i te nä-ô-raa ë :
« I te mea ë, tei mua ia ù te mau hinaaro-tià ö te Etaretia nö tä na ra mau òhipa, i haere pinepine ai au i mua te aro ö te Atua mä te pure-onoono e mä te tiàturi i te mau arataìraa ä te värua
Te reira ihoä tö ù hinaaro mau, mä te arataìhia e te Värua maitaì, ia häroàroà vau nei i tö te Atua mau hinaaro mau nö tä na Etaretia, e ia ravaì i tö ù püai e te itoito nö te faaìte heheu atu i taua hinaaro tö na ra i te Etaretia. Te tuu atu nei au i teie muri nei parau mä te arataìraa ä te Värua Maitaì, e mä te haèhaa e te tiàturi-roa-raa èi heheuraa te faaìte mau nei i te hinaaro ö te Atua. »
I tö te mau Apooraa, te mau Apooraa faatere, te mau Hiva ö te Etaretia e i tö te Apooraa rahi :
1
O teie ïa tö ù hinaaro ia vaiihofaatura-hia ò Clifford A. Cole i tä na mau òhipa i roto i te Tino Ahuru mä Piti. I riro pinepine na tö na âàu marü e tö na paari èi haamaitaìraa rahi a haapaò ai ò ia i tö na tiàraa Peretiteni nö te Apooraa. E tià ïa ia haamämähia ò ia i te mau höpoià nö te töroà Àpötetoro, ia tävini-ä rä ò ia i raro aè i te faatereraa ä te Peretiteniraa Mätämua i te mau tuhaa òhipa haapiiraa, e te piaraa puta, ò te reira mau ïa te tahi noa tuhaa nö tö na mau àravihi tei haamaitaì rahi i te Etaretia i te mau matahiti e rave rahi i maìri atu ra.
2
A. Ia vaiiho-atoà-hia ò Donald V. Lents räua ò Aleah G. Koury i tä räua òhipa Àpötetoro nö tä ù Etaretia. Ua tävini räua tätaìtahi mä te itoito-fäito-òre, noa atu-ä ïa te mau täfifiraa e rave rahi e te mau ôpiripiri ö te haaraa. Te haapoupouhia nei räua nö tä räua täviniraa i nä matahiti e rave rahi. Ua tävini te Àpötetoro Lents i te tau faatereraa ä nä Peretiteni tootoru ö te Etaretia.
B. Ua piihia räua èi Patereäreha, e ia tià ia räua ia haa i roto i te Hiva Haapii Evaneria. E mai te mea e tià i te Hiva e maìtihia ïa te Àpötetoro Koury èi päpaì parau nö te Pupu.
3
Nö te faaî i te mau pärahiraa vata i roto te Tino Ahuru Mä Piti te piihia nei ò Kisuke Sekine rätou ò Everett S. Graffeo e ò Kenneth N. Robinson ia vaiiho i tä rätou e haa nei e ia tävini èi Àpötetoro nö tä ù Etaretia. E ia faatöroàvave-hia rätou e ia pärahi i roto i te Apooraa Faatere nö te Tino Ahuru Mä Piti, e tià ai.
Te nä-ô faahou mai ra te Värua èi arataìraa :
4
A. E tià ïa ia ìmi-ä te Tino Ahuru Mä Piti i te mau faanahoraa e te mau räveà päpü nö te faahoturaa i te mau òhipa mitionare, ia tià i tä ù Evaneria ia ìte-hau-hia aè e tö te ao. Te faaitoitohia nei teie Pupu Mitinare Nui ia faataa i te tau e au nö te faatüraa i tö rätou mau manaò i nià i te òhipa mitinare. Ei reira ra, e haere ïa rätou i mua mä te mana rahi i te faaìteìteraa i te parau nö ù.
B. Te haamäuruuruhia nei te mau taeaè ö te Tino nö tö rätou ra tähöêraa a feruri ai rätou i te mau räveà paari nö te faataa e te hiòpoàraa i te mau tuhaa mitinare âpï. Aita e täôtiàraa i taua mau tuhaa ra. Terä rä e mea tïtauhia ia faaravaì i te mau haamäuàraa ia au i te rahi ö te maitaì e tïtauhia ra i te pae pororaa èvaneria.
5
A. Te faaitoitohia nei te Epitöpo Faatere e tö na nä Faaaò ia tämau rätou i te ìmi-mäite-raa i te mau räveà ia märamarama maitaì te täâtoàra i te auraa nö teie parau ë : « te tïààuraa i te faufaa tino nei » : ò te pähonoraa ïa ä te nünaa i tö ù nei muihere e tö ù nei aroha. Ei reira ïa e roaa atu ai ia na te ìte höhonu ö taua ture ra, e te òaòa ö te âàu mai tei òre-ä i ìtehia aè nei.
B. O tö ù ïa hinaaro ia tätara-faahouhia te auraa nö te ture tïààuraa i te faufaa pae tino. Ei reira e roaa mai ai te märamarama rahi aè nö te pähono i te mau tïtauraa nö te faanuu i te Etaretia i mua. Ia färii-âmui-hia rä teie faaotiraa e te Etaretia i muri aè i te mätuturaa e te feruriruriraa höhonu. Ei reira ïa te taata e ànaànatae ai i te püpü rahi atu i te faufaa mä te òaòa i te faatupuraa i te òhipa rahi i piihia ai te täâtoàraa.
6
Ia nä reira atoà-hia nö rätou te haa nei i roto i te mau vähi mitinareraa tei tonohia änei e te Hui Mana, e höpoià nä rätou ia tämau i te pähono i te tïtauraa ia tävini mä te tuutuu-òre ia tae “ i te fäito au i te ùmiùmiraahia te hotu, ua faarapumaitaìhia e manii roa atu i räpae i te färii”. E ia nä reira rätou, e tupu mai ïa te tiàturiraa nö rätou e nänä atu ra te mata i nià i tö ù mau tävini nö te ìmi i te âveià tano.
7
A. E tö ù nei nünaa ë, ia rahi tö òutou ànaànatae. E èiaha òutou e tapitapi nö te päpü-òre, te fëàà rahi, e te häroàroàòre ä te tahi pae nö te huru ö te faatiàraa i te Pätireia. Mai te mea e haere òutou mä te faaroo e te tiàturi i te pororaa i tä ù èvaneria, e fänaò ïa òutou i te püai ö tö ù nei Värua ë, e rave rahi ïa ö rätou e pähono, e tae roa atoà atu i te mau vähi àita-ä i päpü mai ra i teie taime.
B. A turu mä te aroha e te here ia òutou òutou iho, e mä te tiàturiraa ë, tei pïhaì-atoà-iho ïa vau ia òutou, mai tä u i faaìte noa mai na te êà ia òutou mai mua mai.
Wallace B. Smith
Peretiteni nö te Etaretia
I Initipeniteni, Mituri
I te 8 nö Eperëra 1980