« Nö te mau tïtauraa ö te mau höpoià i tuuhia mai ia ù anaè iho nei, i pure ai au mä te tuutuu-òre e te feruri-noa-raa ia roaa mai ia ù te ìte nö te pähonoraa i te mau hinaaro-tià ö te Etaretia. A ìmi-onoono ai au i te märamarama e te paari nö taua mau hinaaro-tià ra i haamaitaì ai au ia ìte mau vau ë, ua roaa mai ia ù te tahi haapäpüraa ò tä ù hoì e tuu atu nei i tö te Etaretia èi parau nö te mau hinaaro-tià ö te Atua. Nö reira te tuu atu nei au i teie nei parau ia feruri mäite òutou i te reira mä te pure ».
I tö te mau Apooraa, te mau Apooraa faatere, te mau Hiva, e i tö te Apooraa Rahi :
1
A. I te mau matahiti e rave rahi i tävini ai tö ù tävini ò Reed M. Holmes èi ìte-tià-mau i roto i te Tino Ahuru Mä Piti e i nä matahiti e vaù i maìri èi Pätereareha Faatere nö te Etaretia, nö te reira tumu, te vaiiho-faatura-rahi-hia nei ò ia i tä na mau òhipa teiaha, e ia färii ò ia i te piiraa èi òrometua faatura-hanahanaha-hia, e tià ai.
B. E ia tämau-ä ò ia i tä na òhipa Pätereareha e te Haapii Evaneria i te mau räveà e au ai. Teie rä, i te mea e faaea ò ia i te mau òhipa ä te òrometua tumu, e tià ia na ia haapaò i te mau òhipa e ànaanatae ai ò ia, mai te òhipa i te Hau Itaraèra e i te Fenua Moà.
2
A. Te piihia nei ò Duane E. Couey i te töroà Pätereareha e ia färiihia ò ia èi Pätereareha Faatere i te Etaretia. I taua töroà ra e rave ò ia i te täviniraa faufaa rahi èi metua värua nö te Etaretia. Ua ìteê-hia na teie piiraa i tö ù tävini, e ua tae mau hoì i te tau ia faaoti-vave-hia tö na faatöroàraa.
B. E riro tö te Peretiputero Couey àravihi e tö na paari i te pae värua, tei ìtemaitaì-hia a mau ai ò ia i te tiàraa èi Faaaò i nä Peretiteni e piti ö te Etaretia, èi haamaitaìraa rahi roa i te mau taata, mai te mea e färii ò ia i taua piiraa teitei ra e te moà.
3
Nö te faaî i te pärahiraa vata i te Apooraa Faatere ö te Peretiteniraa Mätämua te parauhia nei ia faatöroahia ò Alan D. Tyree i tö na tiàraa Àpötetoro i roto i te Apooraa Faatere ö te Peretiteniraa Mätämua, e èi Faaaò nö te Peretiteni ö te Autahuàraa rahi e nö te Etaretia. E riro hoì tö na àravihi e tö na mau ìte ò tei faaineine-rahi-hia a haapaò ai ò ia i te tonoraa mitinare e èi üpoo faatere nö nä matahiti e toru àhuru mä piti èi faufaa rahi i roto i teie töroà âpï. E ia faatöro-vave-hia ò ia e tià ai.
4
A. Te vaiiho-faatura-hia nei tö ù tävini täiva-òre ò John C. Stuart i tä na òhipa i roto i te Tino Ahuru Mä Piti. Ua färii au i tä na mau raveraa i te mau matahiti e rave rahi ë, e tià roa ia höroàhia-atu ia na te tiàraa èi òrometua faahanahanahia.
B. Te piihia nei ò ia èi Pätereareha, e ia tià ia na ia faatöroàhia e ia haa ò ia i tö na vähi i roto i te Hiva.
5
Te parau-atoà-hia nei tö ù nau tävini ò Joe A. Serig, räua ò James C. Cable èi nau Àpötetoro nö tä ù Etaretia. E ia haafaaeahia tä räua òhipa tumu i te tau e au ai, ia faatöroàhia e ia rave räua i tö räua tiàraa èi ìte-tià-mau nö tä ù Evaneria, e tià ai.
Te faaue faahou mai nei te Värua ia parau-ä vau i teie i muri nei nö nià i te òhipa e tià ia ravehia :
6
Ua nane-noa-hia vetahi ö òutou a rave ai i te òhipa täviniraa a faaàtihia ai i te mau reo ò tei manaò ë, te ìte nei rätou i tö ù nei mau hinaaro, e tei tïtau ia peehia atu rätou. A tono päpü atu ai ia òutou ia haere atu e poro i te parau ö tä ù Evaneria, ua rahi ïa tei òre i färii i te mau arataìraa tä ù i tuu-ê-hia na, e ìmi noa rä rätou i te tahi atu-ä mau täpaò nö taua parau mau ra.
7
A ìte mai, e tö ù nünaa ë, ua hope te tau haamarirauraa. Te ûùru nei te ao nei ia faatiàmähia e te parau mau ö tä ù Evaneria tä ù i tuu aè na nö te faaoraraa i te ao nei. A tämata na i tä ù mau parau. A tiàturi na i tä ù mau parau tei höroà-ê-hia atu na èi faaitoitoraa ë, èi faatiàraa mai ïa ia òutou ia tae i te tau fëààraa. Eiaha òutou e faateiaha i te manaò a feruri ai òutou i te mau räveà nö te pororaa atu i tä ù parau ò tei tià ia haapaòhia mai tei au i te mau tïtauraa e te mau huru e vai ra i reira.
8
Te hinaarohia nei ia tomo te mau tävini i roto i te òhipa ä Tiona. Nö reira, èiaha e haamarirau ë e fëàà, te vai nei au. Ua ìte au i tö òutou na ahoaho, e te taa atu ra ia ù tö òutou na mau feruriraa päpü-òre. Terä rä, mai te mea ë, e tiàoro mai òutou ia ù mä tö ù iòa, e haere atu ïa tö ù Värua i mua ia òutou i te mau vähi hoì i tonohia ai òutou ë è tämau-ä vau i te haamaitaì ia òutou ia au i tä òutou na höpoià.
To òutou tävini i te Metia,
Wallace B. Smith
Peretiteni nö te Etaretia
I Initipeniteni Mituri
I te 29 nö Mati 1982