I te mau Apooraa, i te mau Hiva ö te Etaretia, i te Apooraa Rahi e i tö te Etaretia:
« I te haapaò-roa-raa i tä ù höpoià èi Perofeta nö te Etaretia, i mäìmi onoono ai au mä te pure e te haapaeraa mäà i te mau âvaè e rave rahi ia roaa mai ia ù te arataìraa ä te Värua Maitaì. Aita atu tö ù e hinaaro, maoti rä ia ìte roa vau i te hinaaro ö te Fatu, nö te haamaitaìraa i te Etaretia. Atirä noa atu tö ù paruparu, ua manuia roa taua mau mäìmiraa ra e ua haamaitaì-roa-hia vau e te arataìraa ä te Värua Maitaì a faaineine ai au i teie parau tä ù e tuu atu nei. Nö reira, te höroà atu nei au mä te päpü roa i tei muri nei, e ò tä ù ïa e tiàturi roa nei ë ò te hinaaro mau ïa ö te Atua nö te Etaretia. »
1
A. O teie ïa tö ù hinaaro ia vaiihofaatura-hia ò Lloyd B. Hurshman i tö na tiàraa i roto te Tino Ahuru Mä Piti. Ua mäuruuru roa vau i te täviniraa tä na i rave noa na i te roaraa ö te tau noa atu te oraraa atäta e tö na hoì mau àti tino nei.
B. Ia faatiàmähia ò na ia tävini-ä ia ù èi Tahuà Rahi i raro aè i te faatereraa ä te Peretiteniraa Mätämua. Ei reira hoì e haapaò-maitaì-roa-hia ai tä na mau tärëni e tö na mau àravihi nö te faaineineraa i te faatereraa òhipa.
2
A. Ia vaiiho-faatura-atoà-hia ò Roy H. Schaefer i tä na mau höpoià teimaha i te Apooraa ä te Tino Ahuru Mä Piti. Ua tävini ò ia mä te maitaì-hau-aè noa atu tö na mau àti tino nei, e te faaturahia nei ò ia nö tö na faaroo-tuutuu-òre.
B. Ia tämau-ä ò ia i tä na täviniraa èi Tahuà Rahi i te mau vähi e hinaarohia ai tä na mau tarëni e tö na mau àravihiraa òrometua nö te turu-maitaì-raa i te òhipa ö te Evaneria, e tià ai.
3
Nö te faaî i te mau parahiraa vata te piihia nei ò A. Alex Kahtava räua ò John P. Kirkpatrick èi nau Àpötetoro ìtetià-mau i te Apooraa Faatere nö te Tino Ahuru Mä Piti. Ia faatöroà-vave-hia räua, ia tere te òhipa i mua mai te tià mau.
4
Te faaturahia nei tö ù tävini ò Francis E. Hansen nö tö na itoito e tö na faaroo tià mau, e nä roto i tö na âàu marü a haapaò ai ò ia i tä na òhipa èi Epitöpo Faatere nö nä matahiti àhuru e mä ono. Te haamämä-ê-hia nei ò ia i te mau höpoià nö taua òhipa faatereraa ra, mai te mea ë, e färii te Apooraa Rahi ia faatöroàhia ò ia èi mero nö te Pupu Haapii Evaneria, e tià ai. I tö na töroà âpï e tià ia tämau-ä ò ia i te tuuraa i tä na mau tärëni nö te tauturu i te haamauraa i te hiero, e nö te faanahonahoraa hoì i te tahi mau täviniraa tei au i te òhipa ä te Haapii Evaneria iho.
5
O Gene M. Hummel ò tei haapaò mä te tuutuu-òre e te maitaì èi Faaaò, te piihia nei ò ia i te tiàraa Epitöpo Faatere. Nö tö na ìte rahi e tö na mau àravihi e tià roa ia na ia färii maitaì i teie piiraa. E tià ïa ia rave ò na i teie òhipa, a vai maì-òre ai ò ia e te manaò itoito. E ia faatöroàvave-hia ò ia i taua töroà ra, e tià ai.
6
Te pii-faahou-hia nei ò Ray E. Mc Claren ia tämau-ä èi Faaaò nö te Epitöpo Faatere. Ua fariihia tä na täviniraa e tö na haapaòraa i te òhipa. E tià ia faatöroàvave-hia ò ia, e tià ai.
7
Mä te ìte ë, e tià roa ïa ia faaâpïòiòi-hia te Epitöporaa Faatere, te piihia atu nei tö ù tävini ò Norman E. Swails ia färii ò ia i tö na tiàraa èi Faaaò nö te Epitöpo Faatere, e ia faatöroàhia ò ia mä te haamanaraa ä te Tino Etaretia.
Te pii faahou mai ra te Värua i te tino Etaretia ë :
8
Vau nei te Fatu, ua mäuruuru roa vau i te itoito ia òutou na nö te faaineineraa ia òutou nö te faatiàraa i tö ù hiero i te Vähi Pü. O rätou – mero nö te Etaretia e òre noa atu-ä i te mero – ò tei faaineine ia rätou nö te tururaa i teie òhipa nä roto i te mau haapiiraa e te mau faaineineraa taa-ê, e haamaitaìhia ïa e au nö tö rätou imi-onoono-raa e te tiàoroûàna-raa ia ù. E ia nä reira hoì rätou i te faaineine ia rätou, e nïnii atu ïa vau i tö ù Värua i nià i te täâtoàraa ö te feiä rave òhipa, èi reira ïa è tià mai ai te tahi täpaò ûàna nö tö ù here e tö ù mau hinaaro nö te haamaitaì i tei poietehia e au.
9
Terä rä, a haapae i te faateòteòraa ia òutou a mätaìtaì noa ai i te paturaa, e èiaha atoà hoì tö ù hiero ia faarirohia èi òhipa faufaa-òre. Te haaputuhia nei te faufaa nö te faatiàraa i te tino ö taua fare ra ë, e riro te tahi mau faaueraa mai roto atu i te mau pü täviniraa i te tïtau atu ia òutou na i te tahi atu-ä mau tütia teiaha mau. E tià roa ïa ia faaòhipa-mäite-hia taua mau tütia ra e ia püpühia mai ïa te reira mä te òaòa rahi ö te âàu, mä te haèhaa atoà rä, nö te tahi ao tei roto i te fifi.
10
Te aò-faahou-hia atu nei te Etaretia ia faaea roa te märöraa nö nià i te huru ö te mau haapiiraa tumu nö te faaroo, e te tätararaa parau ä te mau puta moà. Ia hinaaro-noa-hia atu rä te mätuturaa nö taua mau mea ra, ia haapaòhia ia nä roto i te âàu märü. E ia ravehia te mau faaâfaro e te mau faahauraa maoti te ture ä te Etaretia i raro aè i te faatereraa ä te Peretiteniraa Mätämua, e ia tupu-ä te tähöêraa e te faaòreraa ö te mau märöraa.
Ua roaa atoà mai ia ù te haapäpüraa nö nià i te mau arataìraa tei höroàhia atu i te 10 nö Eperëra 1986 ra. Te faaìtefaahou-hia atu nei taua parau ra, e ia färiihia èi arataìraa pae värua nö te Etaretia :
11
A faaroo mai na e tö ù mau taata nö te Etaretia, ò vau Ietu Metia e nö ù nei hoì òutou i hïmenemene ai, i riro ai òutou èi ìte, e ua pure hoì òutou nä roto i tö ù iòa. Tei ia ù anaè nei te Värua here e te hau i roto i te ao nei, aore rä hoì tö te ao e ìte mai nei ia ù.
12
Ua faaroo vau i tä òutou mau pure tei tae tuutuu-òre roa mai i mua i tö ù aro, e ua tono atu vau i tö ù värua faaora mai te ûùpa ia noho atu i rotopü ia òutou na. Nö reira, e faahau i tö òutou âàu, e a òaòa i te mau èuheraa ia òutou na. Aore änei hoì au i parau aè na ë, e hinaaro hoì nö te Metua i te höroà atu te Pätireia nö òutou ?
13
A. Teie rä hoì, tei rotopü ia òutou na te feiä mataù e te feâà ò tei òre i tiàturi i te mau faaueraa tä tö ù tävini, te perofeta, i höroà atu èi arataìraa nä òutou na. Nö reira ïa i hià e i moè ai te faaroo ö vetahi mau taata.
B. A tupu noa ai teie, ua faaruru òutou tö te Etaretia i te mamae, e ua ère òutou i te tahi tuhaa ö te püai värua tä ù i hinaaro e nïnii atu i roto tä òutou na mau täviniraa.
14
Atirä noa atu rä, a faaroo mai òutou i teie parau e tö u mau taata. E òre tö ù Värua e vai maoro i ô ia rätou ò tei pätoì noa na i tä ù parau. Ua mäuruuru vau i te pähonoraa mä te faaroo tä te tahi pae rahi i haapaò, i te amoraa i te mau höpoià âpï i roto i te Autahuàraa e i te òhipa faatereraa. Tei ia rätou te mau utuà maitataì e te âàu òaòa i faataahia i te mau tau atoà nö rätou tei tävini noa i tö ù iòa.
15
O rätou rä ò te färii ia arataì-ê-hia atu i räpae e te tahi mau reo êê, èita ïa rätou e fänaò i taua òaòa ra. Ia ìte-päpü rä hoì rätou ë, e tämau-ä vau i te parau atu ia rätou ia haere mai e ia färiu mai, e tià ai. Ei reira, nä roto i te haamaitaìraa ä te autaeàeraa e te rave-âmui-raa i te òhipa e roaa faahou-ä ïa te òaòaraa ia rätou. O teie ïa te parau faaoraraa ia rätou ò tei vai noa i roto te òaòa-òre e te òto, ia hoì mai rätou nö te faafaite atu i tä ù tino Etaretia.
16
A. E ûàna rahi tö te mau mana ö te pö i te vävähiraa i tei ravehia e òutou i te mau vähi atoà i tonohia atu ai òutou ë, ia hiòhia atu e au ra ë tei taua mau mana ra te rë. E teimaha rahi tei nià ia òutou i te pororaa i te märamarama ö tä ù èvaneria i roto i taua paòpaò rahi ra.
B. Atirä noa atu rä, ua faaroo vau i tä òutou mau pure a taù mai ai òutou ia ù ë tei pïhaì noa na ihoä vau ia òutou i te mau vähi atoà e nohohia e òutou. Ua ìte au i tö òutou na hinaaro tävini ia ù ë te faaìte päpü atu nei au ë, mai te mea e tämau-ä òutou i tä òutou mau tautooraa, e riro mau-ä ïa tä òutou mau rohiraa mä te âàutae e te hinaaro tävini mau i te färiipoupou-hia e au.
17
Nö reira, i tä òutou na mau haaraa, a tämau-ä i te tiàturi i tö ù nei muihere e i te pähonoraa i tä ù mau faaueraa. E ia tià noa mai òutou i mua ia ù mä te rötahi i roto i te here, e haamaitaì ïa vau ia òutou mä te nïnii atu i te värua ö tö ù nei aroha i nià ia òutou te tahi e te tahi e òia atoà hoì e i tö te ao nei èi reira hoì òutou i te tonoraahia e au nei. Amene.
Wallace B. Smith
Peretiteni nö te Etaretia
I Initipeniteni, Mituri
I te 12 nö Eperëra 1988