« I muri aè i te tuatäpapa e te ìmiraa mä te pure i te hinaaro ö te Atua, i färii ai au i te haapäpüraa ä te Värua Maitaì nö te mau tauiuiraa i muri nei i roto i te mau Apooraa e te mau Apooraa Faatere. Te püpü atu nei au i taua mau parau ra mai tei tià i te hinaaro mau ö te Atua. E te ani atu nei au ia färiihia ïa e te Apooraa Rahi, e ia haapaòvave-hia e tià ai. »
I tö te mau Apooraa, te mau Apooraa faatere, te mau Hiva, e i tö te Apooraa Rahi :
1
A. Ia vaiiho-ê-hia ò Alan D. Tyree i te Apooraa Faatere ö te Peretiteniraa Mätämua. I muri mai i tä na täviniraa nö nä matahiti e 42 èi òrometua tumu, e mea tià roa ia faatuhaahia ò ia, a rohi noa atu ai ò ia nö te faaòhipa i tä na mau tärëni èi rahuà ë èi arataì i te mau òhipa haamoriraa nö te faahoturaa i te mau piha täviniraa ä te Hiero.
B. Nö te faaî i te pärahiraa i vata mai, te piihia nei ò W. Grant Mc Murray èi òrometua tumu nä te Etaretia, e ia faatöroàhia ò ia èi Faaaò i te Peretiteni ö te Autahuàraa Rahi e nö te Etaretia ë èi mero nö te Apooraa Faatere nö te Peretiteniraa Mätämua. Ia rave-vave-hia tö na faatöroàraa e tià ai ia tupu ôhie te tauiraa i roto i taua pupu ra.
2
Ia vaiiho-ê-hia ò Duane E. Couey i tä na òhipa faatereraa nö te Pupu Haapii Evaneria, e ia faatuhaahia ò ia i muri mai i te täviniraa i te Etaretia i nä matahiti e rave rahi mä te paari, te faaroo e te püai rahi ö te pae värua.
3
Ia vaiiho-atoà-hia Paul W. Booth i tä na täviniraa tuutuu-òre i roto i te Tino Ahuru Mä Piti. Te piihia nei ò ia èi Haapii Evaneria, e ia färii ò na ia amo i te töroà Peretiteni nö te Pupu Haapii Evaneria. A haapaò ai ò ia i taua töroà ra, e riro ïa tö na ìte-höhonu-raa i te òhipa èi räveà nö te faaâànoraa i tö tätou märamarama i te mau haamaitaìraa pae värua te poihia mai e te höê Haapii Evaneria.
4
Ia vaiiho-ê-atoà-hia ò William T. Higdon mai roto mai i te Tino Ahuru Mä Piti. Ua tävini ò ia mä te tuutuu-òre e te haapaò maitaì èi ìte-tià-mau nö Ietu te Fatu. A rohi ai ò ia èi òrometua vaiihofaatura-hia, e roaa ïa ia na te faataamäite-raa i te taime e au nö te tävini èi Peretiteni nö te haapiiraa teitei tuatoru Graceland College.
5
Ia vaiiho-atoà-hia ò Kisuke Sekine mai roto mai i te Tino Ahuru Mä Piti. E tia ïa ia vaiiho-faatura-hia ò ia e ia tämauä i tä na täviniraa èi Tahuà rahi i te roaraa e te taime e au ia na.
6
Nö te faaî i te mau pärahiraa i vata iho nei te piihia nei ò David R. Brock rätou ò Lawrence W. Tyree e ò Stephen M. Veazey mä, ia vaiiho i te mau tiàraa e mauhia nei e rätou ia riro rätou èi mau Àpötetoro, e ia faatöroà-vave-hia rätou èi ìte-nounou-hia nö te Fatu, ia päpü mai te tururaa ä te Apooraa Rahi.
7
A. Ia vaiiho-ê-hia ò Gene M. Hummel i tö na töroà Epitöpo Faatere. Ua ìte-mäuruuru-hia tä na täviniraa faufaa rahi i te tau i faatiàhia ai te Hiero i Initipeniteni. E tia ïa ia vaiiho-faaturahia ò na i tä na ra mau òhipa teiaha.
B. Nö te faaî i teie mau pärahiraa vata, te piihia nei ò Norman E. Swails èi Epitöpo Faatere nö te Etaretia. Ua ìtehia ë, ua riro ïa tö na àravihi nö te haaputuputuraa i te faufaa nö te faatiàraa i te Hiero, èi haamaitaìraa i te Etaretia. E e tià ïa ia faatöroà-vave-hia ò ia.
8
A. Ia vaiiho-ê-atoà-hia ò Ray E. Mc Claren i tä na hopoià Faaaò nö te Epitöpo faatere. E tamau-ä ò ia i te rohi èi Epitöpo nö te Etaretia täâtoà mä te faaòhipa i tä na mau tärëni nö te haapii i te meroraa ia paari rätou i te tïààuraa i tä rätou faufaa pae tino nei.
B. Nö te faaravaìraa i te Epitöporaa Faatere, te piihia nei ò Larry R. Norris räua ò Dennis D. Piepergerdes èi nau Faaaò nö te Epitöpo Faatere, e ia faatöroà-vave-hia räua e tià ai.
Te faaue faahou mai nei te värua ia parau atu vau i teie i muri nei èi türamaraa i te òhipa-faufaa-rahi èi reira tätou i te fanoraa :
9
A. E tö ù nünaa here iti ë, ua faaroo vau i tä òutou mau pure, òutou tei î te âàu i te ahoaho nö te mau mea e tupu nei nä te ao nei e i roto i te Etaretia. Nö taua mau fifi ra i ètaèta ai te âàu ö rätou e rave rahi e ua türaì ia rätou ia färiu-ê atu ia ù nei e i te òhipa i piihia ai te täâtoàraa.
B. Ua riro hoì tö òutou mau fifi èi fifi nö ù iho e tö òutou mau roimata èi roimata nö ù iho, inaha te haamörohi nei te püai ö te ìno i tä ù Etaretia, nä roto ïa i te mau âmahamaharaa e te faataa-ê-raa, e tae roa i te faaitiraa mai i te mau ö ä te taata. Ia haamäuruuruhia rä òe e tö ù nei nünaa nö tö òe vai-mäite-raa i roto i te faaroo a patu noa ai òe i tä ù nei òhipa, noa atu te mau haamarirauraa tau poto noa.
10
E tö ù Feiä Moà iti ë, ia ìte mai rä òutou ë, e püai taa-ê mau-ä tö te väruafëàà e te haamörohiraa ö te itoito, e riro hoì te reira i te haaparuparu atoà i tö òutou ito pae värua, nö reira e mea tià roa ia faaruru i te reira mau fifi maoti ïa i te höroà-hua-raa i te here, te aroha e te tururaa ia òutou òutou iho, te tahi i te tahi.
11
A. Nö reira, ia vai-ä òutou èi feiä püai i roto i te tiàturiraa. Ia òutou ò tei faaroo i tö ù nei reo e tei tiàturi i tä ù nei mau èuheraa, e faaìte atu ïa vau ia òutou e ò vai Au nö te höroà atu tö ù nei hau ia òutou, noa atu te fëàà ö tö òutou na mau manaò.
B. E inaha ë, te rü nei au i te nïnii atu i te mau haamaitaìraa hau aè ò tei òre-ä i ìtehia e òutou na, mai te mea ïa ë, e tö ù nünaa iti ë, e faaineine òutou òutou iho nä roto i te haapiiraa e te pure.
C. A tiàturi päpü i te faufaa nö te mau ôroà moà nö te faahoturaa i te oraraa värua ö te tino Etaretia. A ìmi mäite ia häroàroà òutou i te tumu mau nö tö ù hinaaro ia höroà atu i taua mau ôroà moà ra, e a faaineine ia òutou nö te färii i tö ù värua i te vairaa nä roto atu i te mau òhipa haamoriraa.
12
Ua mäuruuru vau i tö òutou na faaroo nä roto mai i te nuuraa ö te mau òhipa paturaa ö te Hiero i Initipeniteni. E, a ìmi noa ai tö ù mau tävini nö te mau pupu faatereraa rahi e te tino täâtoà ö te Etaretia i te märamarama nö te haapaòraa i te òhipa ö te Hiero, èi reira ïa tö ù Värua e faaî ai ia òutou i te òaòa nö te arataìraa ia òutou i te tahi atu-ä häroàroàraa hau aè i te auraa mau nö tö òutou piiraahia ia haere i tö te ao atoà nei mä tö ù nei iòa e nö te paturaa i tö ù nei Pätireia.
Wallace B. Smith
Peretiteni nö te Etaretia
Initipeniteni Mituri
I te 5 nö Eperëra 1992