Nä roto i te mau matahiti, a pure ai au nö te mau mea e hinaarohia nö te maitaì ö te Etaretia, ua òaòa roa vau i tä te Värua i höroà-hua mai èi haamaitaìraa ia tätou. Nä roto i taua värua mäuruuru ra, te höpoi mai nei au nä te Etaretia i te parau tä ù e tiàturi nei mai te haèhaa ë, ò te manaò e te hinaaro ïa ö te Atua. Nö reira, te püpü atu nei au i te reira, e nä òutou e feruri e faaoti atu ai tei au ia òutou.
I tö te mau Apooraa, te mau Apooraa faatere, te mau Hiva, e i tö te Apooraa Rahi :
1
Ua vaiiho-faatura-hia ò Paul W. Booth i tä na òhipa Peretiteni nö te mau haapii èvaneria. Ua riro tö na paari e te faufaa ö tä na mau raveraa nö te faatupu i te vai-mäite-raa ö te òhipa i roto i te mau tino nö te Etaretia èi haamaitaìraa i te roaraa ö te mau matahiti ë, e tià ïa ia faaea ò ia i tä na ra òhipa mä te tura.
2
A. Ua piihia ò Everett S. Graffeo ia vaiiho i tä na mau höpoià i roto i te Tino Ahuru Mä Piti ë, e tià ia faatöroàhia ò ia èi haapii èvaneria faatere nö te Etaretia.
B. Tei roto ia na te mau höroàraa nö te aroha e ua taa ia na te arataìraa ö te Värua tei au nö taua òhipa haapii èvaneria ra ë, e haamaitaì-rahi-hia te Etaretia mai te mea e pähono ò ia i teie piiraa.
3
Ua vaiiho-faatura-hia ò Geoffrey F. Spencer mai roto mai i te Tino Ahuru Mä Piti. Ua riro tä na mau höroàraa e tö na àravihi nö te òhipa täviniraa e tae noa atu i te faatereraa i te Tino èi haamaitaìraa i te Etaretia. I muri mai i nä matahiti e maha àhuru ö tö na täviniraa èi òrometua tono, e tià roa ïa ia vaiihofaatura-hia ò ia.
4
A. Ua vaiiho-faatura-atoà-hia ò C. Eugène Austin metua mai roto mai i te Tino Ahuru Mä Piti. Ua tävini ò ia mä te âàu-tae e te maitaì ë, e tià ia faaea ò ia i tä na òhipa òrometua tumu mä te tura.
B. Ua piihia ò ia i te töroà haapii èvaneria, e mai te mea e tià ia na, ia faatöroàhia ò ia e ia pärahi ò ia i roto i te Hiva ö te mau Haapii Evaneria.
5
Nö te faaî i te mau pärahiraa vata, ua parauhia ò Danny A. Belrose, e ò Dale E. Luffman, e ò Kenneth L. Mc Laughlin ia riro rätou èi Àpötetoro e ia tävini rätou i roto i te Tino Ahuru Mä Piti. Ia vaiiho rätou i te mau höpoià e mauhia nei e rätou e ia faatöroà-vave-hia rätou e tià ai.
E arataìraa hau atu teie i te Etaretia, nä roto mai i te ururaa ö te Värua :
6
A òaòa na, e tö ù nei mau taata ë. Ua färii hoì au i ta òutou mau täviniraa e te püpüraa ia òutou iho nö te faatià i te Hiero i Initipeniteni. Ia òaoà e ia fänaò rätou i te òaòa, rätou ò tei rave i te òhipa e tei pure nö te faatupuraa i tei èuhehia mai i mütaa iho ra, e inaha ua tupu ïa, e ua riro èi haamaitaìraa i te mau uì a muri atu.
7
Ia ìte atoà òutou, e tö ù nei Feiä Moà here ë, i te taime e tïtauhia ia haapii e ia tuatäpapa mäite i te parau nö te faaroo e nö te haapiiraa tumu ä te Etaretia, e riro ïa te püai e te itoito nö taua òhipa i te höroàhia mai ia òutou, mai te mea e tiàturi òutou i tö ù Värua nö te turu e nö te faaitoito ia òutou. Eiaha ia raverü-hia te òhipa, ia tämau-ä rä òutou i te tiàturi i te mau fafauraa e tià i te vairaa mai roto mai ia Na tei höroà-hua mai i te ora nö òutou.
8
Ei reira, ia päpü òutou i te tiàturiraa e i te taaraa i te arataìraa ö tö ù nei Värua, e haamata ïa òutou i te ìte nä roto i te mata âpï ë, e täpeà mai i te mau parau e riro i te türama i tö òutou ìte ë, e nuu-ä ïa òutou i mua mai te òaòa, nö te faaotiraa i te mau tuhaa òhipa tei faataahia nä òutou e rave.
Tö òutou tävini,
Wallace B. Smith
I Initipeniteni, Mituri
I te 10 nö Eperëra 1994