I te 21 nö Eperëra 1996, i höpoi atu na vau i mua i tö te Etaretia i te tahi mau parau aòraa tei faauruhia mai, àita rä i faaìtehia mai te faaotiraa hopeà ö taua parau àro ra. Ua tiàturi au ë, e faufaahia te Etaretia ia feruri e ia ora i roto i te värua ö taua mau parau ra, mä te rü-òre i te färii i te reira èi heheuraa nä te Etaretia. I roto i nä matahiti e maha i maìri aè nei, ua hiò faahou e ua mäìmi pinepine au i te auraa höhonu ö taua parau aò ra mä te ui ë, ua tià änei nö teie nei ànotau. Aita vau i tütonu i nià i te mau taò e te mau îrava, i tae mai ai te ìte ia ù ë tei roto taua poroì ra i te tià ; teie rä, ua ìte au e àita-ä teie parau i tae i tö na vairaa, e te vai atu ra te auraa i muri mai. Aita-ä hoì au i tae i te manaòraa ë, e riro te Faatauiraa 2000 i te puhi mai i te tahi auraa höhonu atu-ä.
Ua tautoo tämau vau i te auraa ö teie poroì, mai te mäìmiraa i te mau parau e au ia faahitihia, inaha ua ìte au i tö ù paruparu e tö ù taa-òre. Ia au i te hopoià rahi tä ù e amo nei, e i tö ù here rahi i te Etaretia e i tö na ra feiä, e mai te mäuruuru i te Atua ò tei tauturu mai ia ù noa atu tö ù nei mau paruparu, te püpü haèhaa atu nei au i teie parau aò nä te Etaretia, ia feruri e ia faaotihia e tià ai. Te rave nei au i te reira mä te tiàturi ë, nä te Värua tei àpee mai i te faaineineraahia ö taua parau e pärahi atoà mai ia rätou ra ò te färii i teie piiraa.
Nä te mau Tino, te mau Apooraa, e te mau Hiva, e nä te Apooraa Rahi e tö te Etaretia :
1
A. A faateitei aè na i tö òutou mata e a hiò tuutuu-òre na i ô i muri atu i te ìriätai i te vähi ätea roa i reira òutou i te tono-raa-hia. A rätere mä te tiàturi e te ìte päpü ë, teie òhipa rahi e te faahiahia, nö teie ia tau e nö te mau tau atoà.
B. A tïtau na i tö òutou pärahiraa ôtahi roa e te moà i rotopü i te feiä te pii atoà nei ia rätou iho i te iòa ö Ietu Metia. A tiàturi tämau na i te värua ö te Etaretia i faaâpïhia, e ia vai ara noa ë, ò te värua hoì te reira nö te mau mea âpï ò te noaa nä roto i te manaò âàpo, te värua färii e te mäìmiìmi. A haere mä te ièiè e te peepee ö te âvae. Ia riro òutou èi feiä òaòa, ia àtaàta e ia haùti e ia hïmenemene, e ia riro òutou èi mau tià mau nö te tïaìturu e te tiàmäraa nö roto mai i te Evaneria.
2
A. Ia riro òutou èi nünaa nö te Hiero – mai te feiä è ite mata atu ra i te mau hämani-ìno-raa, e te poro ra rä i te hau, te häroàroà ra e te vaivai noa ra te peàpeà e rave rahi, e inaha te faatoro atu ra i te rima nö te faafaiteraa, ò te färerei atu ra i te feiä ua pëpë te värua, te ìmi ra rä i te räveà nö te faaoraraa.
B. A faatupu i te mau ôpuaraa ä te Hiero mä te täpeà mäite te hinaaro täviniraa i roto i tö òutou na âàu. Ua patuhia te Hiero maoti tä òutou mau tütia e tä òutou na mau mäìmiraa i te roaraa nö nä uì e rave rahi i maìri atu. Ia tià mai te Hiero èi taipe teitei e te päpü nö te tahi nünaa tei faaruru mai na i te mau hämaniìno-raa e te mau peàpeà e inaha te tütava noa ra ia tupu te Hau ö Ietu Metia nä te ao nei.
3
A. A haamahora i to òutou âàu e a häroàroà i te mau hinaaro rü ö tö òutou mau taeaè e tuahine te noho ôtahi noa nei, tei vahavahahia, tei roto i te mataù, tei haapaò-òre-hia e te ère nei i te here e te aroha. A haere atu ia rätou ra, mau päpü mai i tö rätou mau rima e a tïtau marü atu ia rätou päâtoà ia fänaò i te mau haamaitaìraa ö te Autahi tei poietehia e Ana tei faaruru i te mamae nö tätou päâtoà.
B. Eiaha e mataù te tahi i te tahi. A faatura i te huru ö te oraraa i haerehia mai e te taata tätaìtahi, noa atu te pëpë-rahi e te täòpaòpa ö te värua, inaha ò vai ïa taata tei òre i haere ôtahi noa i te tahi mau taime. A faaìte e ua ineine vave òutou i te faaroo e te rü-òre i te haavä, a riro tä òutou mau faahaparaa èi mea tià-òre e àita nei hoì e värua faaora i reira.
C. A faaòromaì òutou te tahi i te tahi, inaha e òhipa rahi e te faatupu mamae hoì nö te faatupuraa i te höê autahi moà. Ua pii tätaìtahi-hia rä tätou ia ora i roto i te höê autahi tei î i te here e te aroha. Ia itoito e ia riro òutou èi feiä mata-ara i te tiàturiraa ë, e riro te ao i te tauihia maoti noa te puai ö te tahi puè rii taata mataùòre. E, ia na nià aè te here i te mau reo feaa e te faataaê e te haaparuparu.
D. A tiàturi ë, te êà nö te faatauiraa e nä roto atu ïa e nä räpae ia òutou. Te êà nö te faatauiraa, tä te pipi ïa e pee.
4
A. Eiaha e hiò-ê atu i te feiä riirii i rotopü ia òutou na, e faufaa rahi hoì tö rätou i mua i te aro ö te Atua. A färii na i te tärëni e te püai ö te mau tamarii e te feiä âpï, a toro atu na te tarià ia märamarama òutou i tä rätou mau uiuiraa e te paari i reira. A pähono atu i tö rätou hinaaro ia here e ia turuhia rätou i tö rätou ra tupuraa.
B. Ia ìte päpü òutou i te mau tauiraa ö te mau puètau nö te oraraa, mai te tau mähanahana ö te tamariiraa e tae atu i te taureàreàraa e tae roa atu i te tau toètoè nö te paariraa. A ìte e näfea rä òutou i te hii mai i roto ia òutou tö òutou mau taaê-raa te tahi i te tahi. Ia riro òutou èi feiä marü e te òpere aroha. A haamanaò-ä ë, e mea tïtauhia te mau tärëni ä te täâtoàraa èi faatupuraa i te mau òpuaraa ä te Atua.
5
A faatura i te peutumu. Eiaha ia òre i te faaroo mäite atu atu i te pororaahia te âài nö te mau päpaìraa moà, inaha e riro te mau Päpaìraa Moà e te faaroo i te höroà mai i te püai e te türamaraa. Eiaha atoà rä òutou ia haavïhia e te mau faanahoraa e te mau ture arataì nö terä e te terä ra puètau. A haamanaò ë, te mau faaueraa tei höroàhia atu nä mua atu na, te vai faaufaa noa ra ïa, terä rä ia faaòhipahia te reira ia au i te nuuraa ö te Etaretia i raro aè i te arataìraa ä te Hui Mana pae Värua e te reo ö te pae rahi tei färiihia e te nünaa ö te Etaretia.
6
A. A tià päpü i te iòa nö na tä òutou e poro nei mä te faatupu i te mau autahipipi huru rau, àpitihia e rätou tei roto i te mäìmiraa, a òaòa noa ai òutou i roto i te faatupuraa i teie nünaa ia riro èi ìte mataara nä roto i te iòa ö Ietu Metia.
B. A toro te tarià i te piiraa rü ia riro òutou èi ùtuäfare rahi e te rötahi nä te ao atoà nei i roto i te iòa ö Ietu Metia, tei faaoti ë ia aroha te tahi i te tahi e ia patu i te pätireia mä te âàu tae, te tumu ïa i pii e i haaputuputuhia ai. E riro ïa te reira èi pätireia nö te hau e tae ia i te ìteraahia ë, ò Tiona mau-ä teie.
7
Te värua nö na tä òutou e pee nei, ò te värua ïa nö te aroha e te hau. Te ìmi nei taua Värua ra ia noho mai i roto i te âàu ö rätou tei pähono i tä na piiraa e ò tei haapaò i tä na ra poroì. E ère teie êà i te mea ôhie i te mau taime atoà, e ère atoà hoì te mau faaotiraa e ravehia i te mea päpü roa i te tahi taime, e mea päpü e te märamarama maitaì rä te tumu nö te reira e riro rä hoì te Värua èi ìte nö te parau mau ë, ò rätou hoì te ora ra i roto i taua parau mau ra, e riro ïa i te färii i te òaòafäito-òre nö rätou e noho ra i roto i te Autahi nö te Metia. Amene.
W. Grant Mc Murray
Peretiteni nö te Etaretia