Tau âvaè te maoro tö ù mänaònaò-noa-raa ë, e päpü aè ra ia ù ë te faaue mai ra te Atua ia rahi aè-ä te ìte ö te Etaretia i te auraa mau a riro ai ò ia èi nünaa mata-ara. A tahi ra vau nei a ìte ai mai teie te püai e te pii-taaê-hia mai ra tätou ia riro èi mau ìte täiva-òre nö Ietu Metia, e ia poro-faahou-ä tätou i teie nei ihoä ànotau i te mau tiàturiraa tumu ö te Etaretia i Faaâpïhia. Ua riro teie mänaònaòraa i te faataupupü mai ia ù, i te mea paha ia ë àita vau i färii vave ia matara mai èi parau, noho noa ai au nei i roto i te ìte-mamae-raa ë e taata hara hoì au e te itiiti i mua ia Na. Ua vai tämau noa mai rä te teiaha e te rü ö teie òhipa i nià ia ù, e tae roa atu i taua pö ra a hurihuri noa ai au mä te topa-òre te taòto, noa atu-ä ïa te rahi fäito-òre ö te turuhe. E inaha atu ra, tià aè ra vau i roto i te muhu-òre ö te ruì e tämata atu ra i te hii mai i taua mea ra i päpaìhia i roto i tö ù nei mäfatu.
Aita rä hoì taua mau parau ra i hee mau-òre noa mai te huru ë, e mea faauehia mai, ua mäiha mai rä mä te mamae mai roto mai i taua färereiraa nö ù nei e te Värua i òhipa noa na i pïhaì ia ù i te roaraa ö teie mau âvaè. Päpaì iho ra vau, e i nä mahana i muri iho ua feruri mäite aè ra vau i te auraa ö teie mau taò, mä te âpapa faahou ia rätou i terä e terä vähi a haere noa mai ai te türamaraa i te rahi. E inaha i teie nei a tuu atu ai au i teie mau parau i mua i te Etaretia, te ìte päpü nei au ë te vai atu ra ä tö rätou auraa. Terä rä, taua ihoä Värua ra i arataì mai na ia ù nö te päpaì i teie mau parau, te faaue atoà mai ra ïa ia ù e tïtau i te Etaretia ia rohi-âmui nö te ìmiraa i tä te Atua e hinaaro ra nö tätou. Aita-ä vau i päpü atu ra ë aha te huru ö teie hinaaro tö te Atua, te tiàturi nei rä vau ë ò te reira ïa tö tätou taahiraa vave a tämau noa ai tätou i te rohi ia riro mau èi nünaa mata-ara.
I tö te mau Apooraa faatere, te mau Pupu autahuàraa, te mau huimänava, i tö te Apooraa rahi e te Etaretia :
1
A. A faaroo mai na rä, e te nünaa nö te tau ö te Faaâpïraa, òutou e hinaaro ra ia riro èi nünaa mata-ara, òutou tei färii i te värua mitinare ö te Hiero i roto i tö òutou oraraa. A faaroo na i te Reo e parau mai ra tähiti aè te mau âivi i te ätea-ê, tähiti aè te teitei fäito-òre ö te raì-tuatini, tähiti aè te höhonu uripaò ö te moana nuinui i raro
B. A faaroo na i te Reo i tavevo noa na nä roto i te òhuraa hope-tau-òre ö te tau, e inaha te parau noa mai nei-ä i teie taime. A faaroo i te Reo, inaha e òre e tià i te haamämü ia na, ò ia te pii faahou mai ra ia òutou i roto i te òhipa rahi e te faahiahia nö te paturaa i te pätireia nö te hau, taua Tiona ra ihoä, i te iòa nö Na tä òutou e poro nei.
2
A. A faaroo mäite i te auraa ö tö òutou rätereraa mai mai te tahi nünaa ra, inaha e rätereraa moà tei haerehia mai ë ò tei haapii rahi mai ia òutou i te huru ö te tere e vai mai ra a muri aè.
B. A faaroo i tä na mau haapiiraa e a hüaì faahou na i tä na mau parau-tumu. Eiaha e heva-muriaroha i te tau i hemo, a ìte rä ë ua vaiiho mai te hui-tupuna i te niu ö tö òutou faaroo, mai ia òutou e patu ra i te niu nö te uì nö ànanahi.
C. Nö te mea e nünaa mata-ara òutou, i piihia ai òutou i raro aè i te faatereraa ä te huimana pae värua, e ia au i tei tià i te pae rahi e ua färiihia e te nünaa, ia ìte märamarama i te hinaaro ö te Atua nö òutou i teie ànotau i te vähi èi reira òutou i te täviniraa. Rave rahi mau tämataraa âpï e färereihia ë òutou i teie ànotau, e mea tià atoà ïa te faaòhiparaa i te mau räveà âpï nö te täviniraa. Te autahuàraa ihoä rä ò te tïtauhia mai ra ia pähono i te mau tämataraa ö te tau âpï, e te tiàorohia mai ra tö te Etaretia ia feruri mäite nä roto i te pure i te auraa mau ö tö òutou piiraahia e te faaòhiparaa i tä òutou mau tärëni i roto i te Autahi nö te Metia i teie nei tau âpï.
D. Ua faaìte-aè-na-hia òutou ë mea nä roto i te mau ôroà moà e hotu ai te oraraa värua ö te Tino Etaretia. E ère nä te huru e te raveraveraa ö te ôroà moà e höroà mai i te muihere, nä te värua moà rä e noho ra i reira e höroà mai i te ora. Ia faatura òutou e i te mau peutumu e ia täuà hoì òutou te tahi i te tahi e tià ai, èiaha rä òutou e faatäfifi ia òutou iho i roto i te mau tätararaa e te mau faanahoraa e òre roa e tü faahou ra i te mau hinaaro ö te tahi Etaretia e torotià atu ra nä te Ao. Nö te mau tätararaa e te mau faanahoraa ra, nä rätou ïa i piihia èi faatere e höroà mai te arataìraa.
E. Te haa-mëhara-faahou-hia atu nei òutou ë, e Etaretia teie tei piihia e te Atua ia tupu. Aita te värua nö te Tau-faaâpïraa i pönaohia i roto noa i te tahi puètau, ua riro rä taua värua ra èi piiraa i te mau uì atoà ia riro èi ìte nö te parautià e te ora e ia poro i te reira nä roto atu i tö rätou mau reo e tä rätou ravepeuraa tätaìtahi. Ia puhi te aho ö te Värua e tià ai.
3
A. Eiaha e haamarirau. Aita te haereraa nä te êà ôhie i tohuhia nö òutou, ua tapuhia mai rä ia òutou ë, e riro òutou i te âpeehia e taua ihoä Värua ra i tiàoro mai na ia òutou.
B. E inaha te tau mai ra taua Värua faaora ra i nià ia rätou e àma ra i te ahi a riro ai èi pipi nä te Metia. Rahi atu-ä ö rätou e färiu mai, mai te mea e riro mau-ä òutou èi ìte ë èi feiä rohi tuutuu-òre i te täviniraa i tö te Ao.
4
A. A toro mäite i tö òutou mau tarià i te mau fäìraa e rave rahi mai roto mai i te mau taata atoà àtitià aè te ao nei, rätou tei arataìhia mai i roto i te autaeaèraa ö te Autahi nö te Metia. Mea nä roto i te faufaa ö te mau taère, te pehepehe ö te mau reo e te ìte e te paari ö te taura-taata, èi reira te Evaneria e ìtehia atu ai mä te mata âpï e te haumärü ö te värua. Ua püpü-taoà-hia mai te reira ia òutou èi tärëni. Eiaha òutou e huritua atu i te püai ö tö na mana.
B. Nö te tahi mau tumu tei faaotihia e te Atua i färerei ai òutou i te mau umeumeraa, i färerei atoà ai òutou i te mau òaòa mai roto mai i te rauraa ö te Etaretia. E ia vai-ä te reira e ia vai noa atu-ä i roto i te Pätireia ö te hau.
5
A. Eiaha òutou ia täpoìhia e te mau mea e faataa-ê ra ia òutou i te Metia, ia vehihia rä òutou i te mau mea e rötahi ai òutou i roto i te Metia ra.
B. Ua parau e ua parau-tämau-hia òutou ia faatupu i te faafaiteraa, ia ìmi i te autahiraa tei riro èi niupapa nö te faatiàraa i te pätireia. E inaha te aò faahou mai ra te Värua i tö te Etaretia ia tatahi atu i te mau püai e faatupu mai i te âmahamaha e riro i te täviri-ê atu ia òutou mai tö òutou atu nei tiàraa èi ìte nö Na.
C. A faaroo atu òutou ia òutou tätaìtahi, mä te haavä-òre i reira ra e àore rä mä te manaò faaoti aè na. Aita-ä te mau pähonoraa i te mau mea e faatupu ra i te âmahamaha i hope atu ra i te ìmihia. E òhipa rahi ä te toe mai ra i te ravehia. A mätutu e a feruri-âmui i roto i te here, èi reira ïa te Värua parau mau e üpootià mai ai.
6
A. I te mau mahana mätämua-raa ra ihoä te höroà-raa-hia atu ia òutou te tahi ture moà e poro ra i te faufaa rahi fäitoòre ö te mau taata atoà. Eiaha roa atu te reira ia àramöinahia ia òutou.
B. O Na tei hämani na i te taura taata, te òto ra ïa i te mau âmahamaharaa faatupu haamä i roto i te ùtuäfare ö te taata nei. E mea tïtauhia te nünaa mataara ia rohi tuutuu-òre nö te faahià i te mau patu nö te faataa-ê-raa, hämani atu ai i te mau taura-firi nö te ìteauraa te tahi i te tahi.
C. Tei roto i tö òutou na rima te oraraa faufaa roa ö te tahi mau taata. Ia marü e ia tupu hoì te muihere ia òutou òutou iho. Aita te püai ö te autahi i hau atu i tö te taata paruparu roa aè i reira. Oia atoà ïa te autahi e amo ra i tö Na iòa i te peeraa ia Na tei haere atu ia rätou ra tei faaruè e tei tatahihia atu i te hiti.
7
A. E rave rahi ö rätou e tïaì noa mai ra i te mau parau faaora ö te Evaneria, e àore rä ia ùmehia mai rätou i räpae i te âpoo ö te hepohepo-fäito-òre maoti te mau rima ö te mau tävini ua î i te here e te aroha. Eita rä hoì rätou e orahia mai te mea ë àita te pähonoraa âàu höroà ö te pipi, ò ia e püpü atoà i te tahi tuhaa ö tä na i fänaò ia ìte atoà aè vetahi-ê i te òaòa ö te pätireia.
B. Rave rahi ö rätou e noho nei i roto i te taiä mä te tiàturi ë tei roto te oraraahau i te haaputu-ûàna-raa i te mau faufaa pae tino nei. Te mau pähonoraa e ìmihia ra e òutou, e ère ïa tei roto i te iho ö te mau taoà ö teie nei ao, tei roto rä i te faaroo ö tä òutou e niu mä te tiàturi-âueue-òre i tei tapuhia mai ia rätou tei pee ia Ietu Metia.
C. Ua höroàhia atu ia òutou na te mau arataìraa nö te âàu e te rima mahora e tei faaau-mäite-hia nö teie tau âpï. Te pii mai ra teie mau arataìraa i te mau pipi tätaìtahi ia püpü i tä na tütia ia au i tä na faufaa e tei maraa hoì ia na. Ua niuhöhonu-hia teie mau haapiiraa i roto i te värua ö te Faaâpïraa, e te haapäpü mai ra te reira ë èita roa e tià ia faataa-ê i te taata tïààu i te pipi inaha e auraa tö te tahi i te tahi.
D. E mea rü te pähono-vave-raa i teie piiraa. A hiò atu i te mau mea e hinaarohia i roto i tä òutou iho mau âmuiraa, òia ïa, a hiò atoà atu rä i ô atu-ä i tö òutou iho mau âua, i ô i taua mau vähi ätea roa e haerehia atu ra e te Etaretia. Ei fare värua nö te pipi tätaìtahi e tià ai. Te piihia mai ra òutou ia patu i taua nohoraa ra e ia tïààu i te reira, ia höroà atoà rä i tä òutou tuhaa nö te mau òhipa mitinare ä te Etaretia nä te ao. Ei reira ra e tae atoà atu ai te èvaneria ia rätou ra te mau värua e hiaài-ûàna ra i te pare ua î i te värua hau nö rätou.
8
A. E feiä maitataì e te faaroo òutou, i te tahi rä taime àita òutou e ìte atu ra i te mana e vehi ra i tö òutou iho tuäâài e tö òutou na autaeaèraa. A hiò mateono, a faaroo tuutuu-òre ë, a färii i te Värua e haa ra i rotopü ia òutou.
B. Eiaha e tapitapi nö tö òutou itiraa. A tütava ûàna ia riro òutou èi ìte nö Na, ia ahu tö òutou ôuma i roto i tö òutou tiàraa pipi, e ia rahi te püai ö te òhipa e ravehia e òutou nä nià i te iòa ö te hau e te faatupuraa i te parautià. E piti e toru aè pipi èi autahi, tei reira atoà ïa te Värua. Ei reira ra, e rave rahi ïa ö rätou e riro i te âmui mai a muri iho.
C. A tämau-ä i tö òutou na tere, òutou na e te feiä nö te Tau ö te Faaâpïraa. Ua haamaitaìhia òutou mai tahito mai-ä ë, e rave rahi-ä te tärava mai ra i mua ia òutou àita-ä i ìtehia, àita-ä i oti i te ravehia. A tià e a haere i mua mä te tiàturi e ia ora mata-ara òutou mai te tahi nünaa tei herehia, e inaha i teie nei ua faaoti mä te mataù-òre e here ia vetahi-ê i roto i te iòa nö Na ra ò tä òutou e tävini nei. Amene.
W. Grant Mc Murray
Peretiteni nö te Etaretia
Initipeniteni Mituri
I te 29 nö Mäti 2004